بعد مجزرة رفح.. تامر أمين للمجتمع الدولي: "مفيش فيكم دكر يوقف نتنياهو المجنون" (فيديو)
انفعل الإعلامي تامر أمين على الهواء مباشرة، بسبب المجزرة التي شهدتها رفح الفلسطينية خلال الساعات الماضية من جانب قوات الاحتلال الإسرائيلي.
مجزرة رفح
وقال خلال برنامجه "آخر النهار"، والمذاع عبر فضائية "النهار"، إن نتنياهو نفسه اعترف بأن ما حدث في رفح الفلسطينية أمس كارثة إنسانية، مؤكدًا أن الكلام العادي عن إسرائيل لم يعد مناسبًا للتعليق على ما تفعله.
وأوضح: "نتنياهو طالع يقول اللي حصل مننا في رفح كارثة إنسانية، ومكناش نحب أنها تحصل، إحنا نتمنى إن ضربنا ما يجيش غير في عناصر حماس لكن بيجي في ناس مش متورطين في العنف وإحنا مكناش قاصدينهم، أنا ما بهرجش اللي باقوله ده قاله نتنياهو في الكنيست".
وأضاف: "أن نتنياهو رغم اعترافه بما حدث في رفح، أكد أنهم مستمرين في عدوانهم، إحنا لسه ما حققناش أهدافنا ولسه مستمرين، مش بس اعترف إنه عمل جريمة، ده اعترف إنه مكمل في الجريمة، لإنه يا عيني ما عندوش حل تاني".
وتابع: "حد من الكنيست بيقول في نقاشهم عن اللي حصل في رفح لنتنياهو أنت ليه مش راضي على صفقة تبادل الأسرى ووقف إطلاق النار، رد عليه قاله طبعًا إحنا عايزين أسرانا، بس عشان في ضغوط علينا من الداخل والخارج، فحماس متشددة وبيغالوا في شروطهم، فبالتالي إحنا مش هنستسلم ومش هنرضى بشروط حماس القاسية".
وواصل: "راجل ولا همه حقوق الإنسان، ولا همه القانون الدولي، ولا المحكمة الجنائية الدولية اللي طلعت مذكرة توصي باعتقاله، ولا المحكمة الدولية، ولا كل دول العالم، ولا الدول اللي اعترفوا بدولة فلسطين، العالم كله واقف ضده، ولا همه كمان مجتمعه، فده راجل وصل إلى حد الجنون، سؤالي للمجتمع الدولي والمنظمات الدولية مفيش فيكم دكر يوقف نتنياهو؟".
