عاجل| أول تعليق من والدة طالبة العريش بشأن واقعة وفاة ابنتها
كشفت نشوى جمعة، والدة الطالبة نيرة صلاح، تفاصيل اللحظات الأخيرة في حياة ابنتها والتهديدات التي تعرضت له قبل وفاتها.
بنتي كانت صايمة
وقالت "نشوى جمعة" في اتصال هاتفي ببرنامج "في المساء مع قصواء" المذاع على فضائية "سي بي سي" مساء اليوم الأحد، "بنتي كانت صايمة لمدة 3 أيام والسبت كانت هتسمع للشيخ بتاعها ورد القرآن".
وأضافت "أنا دخلت أتكلم لأني لقيت لو سكت هيبقى فيه مليون نيرة تانية، وبدأوا يشهروا ويتكلموا على بنتي أنا لما روحت لقيتها ماتت وأخدتها ومشيت وأخدت عزاها وقولت حق بنتي عند ربنا".
ضغط نفسي وعصبي
وتابعت "تفاجأت على النت ومكنش عندي خلفية أنا مكنتش أعرف أي حاجة عن المواضيع دي، بدأنا نفتح تليفونها لقينا محادثات وفويسات لا يقبلها عقل بشر ولا بني آدم".
واستطردت "تهديدات وسخافات لا تصدر من طالبة لما يقولها انتي مش قدها ابعدي عنها، ولقيت النيابة العامة تسأل عن تفاصيل التهديدات".
وأردفت "لما كلمتني بدأت ترجع وقالتلي بطني وجعاني مش عارفة فيه ايه ومن هنا انقطع الاتصال ملقتش لها صوت اتصلوا عليا زميلة بنتي وقالتلي بنتك رجعت كتير ولقينا حبوب في شنطتها".
شكوى لوزارة التعليم العالي
وتابعت "بنتي كانت كاتبة أنها راحت لوكيل كلية طب بيطري قالها انتي مش قد زميلتلك، وأول ما راحت المستشفى محدش أسعفها وقعدوا يسألوها أنتي أكلتي ايه وبنتي مرجعتش دم".
وأردفت "احنا قدمنا شكوى لوزارة التعليم العالي، والبنت التانية المتهمة لما راحت قالها دي قرصة ودن، بنتي كانت صايمة ومش هتفطر على حباية غلة".
آخر كلماتها قبل وفاتها
وأكملت "حتى لو أخدتها فهذا تحت ضغط نفسي وعصبي لما بحكي لوكيل النيابة شاف كتر الضغط والرسائل أنا بنتي قوية وحافظة 17 جزء قرآن".
واختتمت حديثها "بنتي كلمت شيخ القرآن يوم الجمعة وقالت أنا هسمع الورد بتاعي يوم السبت، وآخر كلمة قالتلها لزميلتها أنا مظلومة وحق بنتي عند ربنا".
