توضيح هام من نقابة الموسيقيين بشأن أزمة الفنان إيمان البحر درويش (فيديو)
قال محمد عبد الله، المتحدث باسم نقابة المهن الموسيقية، إن النقابة فور نشر الصورة الصادمة للفنان إيمان البحر درويش عبر مواقع التواصل الاجتماعي حاولت التواصل مع الفنان أو أي أحد من أفراد أسرته.
صورة فاجعة
وأضاف "عبد الله" في اتصال هاتفي ببرنامج "90 دقيقة" المذاع على فضائية "المحور"، "الصورة كانت فاجعة ومثلت لنا صدمة وكلنا صدمنا".
وتابع "فور رؤيته للصورة تواصل النقيب مع كل الناس علشان يعرف الصورة صحيحة ولا مش هي وسمعنا أن بنته هي اللي نشرتها ودي زعلتنا وأنا رأيي الشخصي بلوم على من قام بنشر الصورة".
تكتم من الأسرة
واستطرد "لو أسرة أي فنان مش عايزة تخليني نوصل مفيش مخلوق هيقدر يوصله، وأنا رأيي لو هي كانت ممتعضة من حاجة كان ممكن تقول بالبوست أفضل من لصورة".
وأردف "كل الناس اللي بتحبه محتفظة به بصورة كبيرة وأنا اضايقت لما شوفتها، والنقيب انزعج وأول مرة نشوفه متوتر وبقى مش مصدق ودخل وناشد الجميع اللي يعرف أي وسيلة تواصل معه".
حقوق علاجية
وأكمل "وتوصل إلى رقمين واحد جرس ومحدش بيرد والتاني كان مغلق، وحتى الآن مستنين أي حد يقولنا وفيه تكتم ومفيش حد من الأسرة عايز يتواصل معانا".
وأوضح المتحدث باسم نقابة المهن الموسيقية، "فور التوصل إليه سيحصل على كافة حقوقه العلاجية وهذا ليس تفضل من النقابة ولكن حقه والنقيب لن يتأخر والنقابة عمرها ما تتأخر لحظة عن أي من أعضائها".
