تامر أمين عن سيدة الفستان الأزرق: "متضامن معها قلبًا وقالبٌا"
علق الإعلامي تامر أمين، على واقعة سيدة الفستان الأزرق الراقصة في فرح صديقتها، والذي تسبب في فضيحتها وتهديد زوجها لها بالطلاق، قائلًا: “واقعة مؤسفة وأنا حذرت منها من زمان، وأنا كنت من أول الناس اللي حذروا من الحكاية دي واتهاجمت وقتها وقالولي عايز تقيد حرية الناس، لكن دي حاجة اسمها الحياة الخاصة، لأن الناس هتصورك وهتبهدلك وتنشرها على السوشيال ميديا وتبهدلك حياتك”.
وتابع “أمين”، خلال تقديم برنامجه “آخر النهار”، المذاع على فضائية “النهار” مساء اليوم الخميس،: “سيدة محترمة كانت موجودة في فرح واحدة من أصدقائها وكانت مبسوطة ورقصتلها، والست كمان محجبة، وكانت بترقص بقلب أوي وفرحة أوي، وواضح إنها بتعرف ترقص أوي، وواضح إنها صاحبة عمرها”.
واستكمل: "المصيبة إن هذه السيدة المحترمة متزوحة وبيتها بيتخرب ومهددة بالطلاق، وبقت حديث السوشيال ميديا وتريند خلال الأيام الماضية، أكيد مفيش واحد محترم وعنده دين ونخوة وإسلام هيفرح بحاجة زي دي، والست قالت هترفع قضية ضد اللي صورها، وأنا متضامن قلبًا وقالبًا مع هذه السيدة، رغم إني ضد الرقاصات العاريات لأنه قولًا واحدًا حرام".
