عاجل.. السيسي يكشف تفاصيل توجيهه بالقبض على أحد الأشخاص: "أنا قاعد وواخد بالي"
قال الرئيس عبدالفتاح السيسي، إن البنية الأساسية في إفريقيا تحتاج إلى آلاف المليارات من الدولارات حتى تكون دول، وحتى يعيش مواطنيها بشكل سليم، وحتى يتوقف الاقتتال.
وأضاف السيسي، خلال كلمته بافتتاح محطة تحيا مصر متعددة الأغراض، اليوم الخميس، "الناس بتتقاتل ليه.. عشان مفيش أمل، وعشان تعمل الأمل عايز تبني كتير ومش تبني طريق فقط، الناس عايزة تعيش"، لافتا إلى أن البعض يطالب بإعطاء فرصة أكبر للحريات وهو أمر صحيح، ولكن "الناس مش هتفضل تتكلم وتتفرج لا هتسيبك وهيطلع على البحر يهاجر".
ولفت إلى أنه تم تخصيص موازنة لوزارة النقل تقدر بنحو 2 تريليون جنيه، متسائلا: "حد يقولي على مدار الـ 30 سنة اللي فاتوا وزارة النقل خدت كام"، مضيفا: "إحنا بنحفر مستقبل بلدنا، كل طوبة بتتعمل في البلد أنا معاها وشايفها.. في عمارة طلعت مخالفة في الميناء قولت يتقبض عليه وميخرجش إلا لما يسيب الأرض".
وأضاف، "الرئيس قاعد وواخد باله أن الفساد اللي اتعمل لا يمكن يسيبه، واللي أخد أرض داخل الميناء لا يمكن يسيبه حتى لو طلع ورق في غفلة من الزمان، لو معملتش كده يقدر المحافظ يعمل كده لا خايف"، متابعا مخاطبا وزير النقل: "يقدر وزير النقل يعمل كده.. مش إنت لا خايف".
وتابع: "اللي عايز يبني بلده ميخافش أبدا إلا من ربنا، لو مبقاش عندنا بنية أساسية تليق بدولة يبقا مش بنعمل مستقبل خالص.. إحنا محرمناش الناس عشان نعمل ده".
