عمرو أديب يفتح النار على الدولة ووزير الرياضة بسبب نادي الزمالك
عقب الإعلامي عمرو أديب، على هزيمة نادي الزمالك أمام نادي البنك الأهلي بثلاثية نظيفة بكأس الرابطة، مشيرا إلى أن نادي الزمالك خسر 10 مباريات من أصل 17 مباراة خاضها النادي في 2023، معلقا: "الزمالك حقق رقم قياسي جديد، ده لو الزمالك ساب الماتش مكنش هيحصل كده".
وقال أديب، خلال برنامج "الحكاية" المذاع عبر فضائية "إم بي سي مصر 2"، مساء الإثنين، "ده مش نادي ده خرابة.. مفيش مدرب، واللاعيبة مش بتقبض، ورئيس النادي كان في السجن، متوقع إيه منهم، إحنا إمبارح كنا بنتهان، اللاعيبة لا عندها هدف ولا روح".
وأضاف منفعلا، “جمهور الزمالك حزين، إحنا بقينا فريق تريقة مسخرة، حرام عليكم اللي بيحصل، الوضع من سيىء لأسوء، اعرفوا إيه السبب، فجأة النادي ملهوش صاحب، الفلوس اللي بتضيع دي فلوس الدولة وفلوس الناس، ليه الدولة مش بتتصرف، ومش بقول تصرف معين، حد يقولنا النادي هيتساب عزية وهيتساب لرحمة ربنا، أو بيعوا اللاعبين وظبطوا الحمامات والمطاعم".
واعتبر أن موقف وزير الشباب والرياضة ليس واضحا، معقبا: “هتعرف إمتى، الرأي عند مين، مين الباشا اللي عنده رأي فالموضوع ده"، لافتا إلى النادي لم يعد به إلا "خناقات"، والمعركة الأسطورية مع محمود الخطيب، و"رجعنا للخناقة الكبيرة تاني وفي حالة سلبية من كل الأطراف من الدولة والنادي، اشمعنا الزمالك"، متسائلا: إلى متى سنظل صامتين على هذا الوضع؟، معتبرا أن الوضع أصبح مهينا وسيئا، و"يا تلحقوا النادي يا متلحقهوش"، معلقا: "لا أحسبه تعمدا ولكن سيبوه يقع، في حد قالك دعه يسقط دعه يموت ربنا يتولاه ونقرأ عليه الفاتحة".
وتابع، “فصول الزمالك الباردة كثيرة ومؤلمة ولكن السنادي هى الأسوء، النادي مش حتى واقف على رجليه”.
