أحمد موسي عن هزيمة منتخب الشباب: فضيحة.. عيال صغيرة بتعيط ونفسها اتكسرت
عقب الإعلامي أحمد موسى، على الهزائم التي تعرض لها منتخب الشباب في بطولة الأمم الإفريقية التي تقام على أرض مصر، مضيفا أن المنتخب لم يقدم الأداء المنتظر منه.
السنغال المرشح الأكبر للمجموعة..
وتابع موسى، خلال برنامج "على مسئوليتي"، المذاع على قناة صدى البلد: "كان نفسنا يعملوا حاجة، البطولة على أرضنا، ربنا وقعنا في أصعب مجموعة، السنغال المرشح الأكبر للمجموعة.. السنغال ورانا ورانا، خرجتنا من كل حاجة أمم إفريقيا للكبار والكرة الشاطئية، وكأس العالم، ودلوقتي منتخب الشباب، إحنا ورانا السنغال، كبار وصغار السنغال معانا، هتطلعنا من إيه تاني، فريق كبير، في حاجات كثيرة".
نفسي المنتخب بس كان يسجل هدف واحد
وقال: "نفسي المنتخب بس كان يسجل هدف واحد، هدف يتيم، منتخبنا لم يسجل أي أهداف في البطولة، وفي الآخر نقول الرياضة مش عارف إيه، عايز إيه اكتر من كده، هل إحنا استعدنا كويس للبطولة؟، وهل الكابتن محمود جابر، مدرب المنتخب استعد بالمنتخب كويس؟، إحنا مش قادرين حتى نسجل جون في المجموعة، إحنا غالبا كده مش هنبقى أحسن توالت في البطولة".
أنا صعبان عليا الولاد
واختتم حديثه قائلا: "أنا صعبان عليا الولاد، يمكن كان نفسهم يعملوا بطولة كويسة، لكن في فارق خبرات فنية وإدارية، لكن الدنيا صعبة بصراحة، لكن هنعمل إيه.. المنتخب طالع بفضيحة عيال صغيرة بتعيط ونفسها اتكسرت".
