خيري رمضان للمسئولين: "اخرجوا واشرحوا للناس حقيقة أزماتنا بلا خجل"
طالب الإعلامي خيري رمضان، المسئولين بالخروج للناس ومصارحتهم بالمشاكل والأزمات، قائلًا: "اخرجوا واشرحوا للناس بلا خجل، وقولوا أزماتنا الحقيقة ايه، ومحتاجين مشاركة الناس إزاي، لان طول ما الناس مش فاهمة هتبقى غضبانة وفي فرق بين المعاناة بالاقتناع والمعاناة بالغضب".
غضب الناس
وقال الإعلامي خيري رمضان، خلال حلقة اليوم السبت، من برنامجه "حديث القاهرة"، المذاع عبر فضائية "القاهرة والناس"، إنه شارك في ندوة بأحد الأندية الرياضية، وفوجئ بحالة من الغضب والتألم من الناس، وأن لديهم رغبة أن يتكلموا، مضيفًا: "الناس عندها معلومات كتير جدا غائبة وميعرفوش الحقائق في حاجات كتير".
غياب المعلومة
وأضاف: "كل اللي الناس يعرفوه أنهم في أزمة ولكن مش فاهمين الأزمة ليه بشكل حقيقي، ومعندهمش معلومات عن حاجات كتير اتعملت في البلد سبب تنفيذها ايه، والناس عندها حالة من غياب المعلومة وميعرفوش ومحدش بيطلع يكلم الناس ببساطة وكلها تصريحات، والتصريحات الرسمية لا تقنع الناس".
اشرحوا للناس
واستطرد خيري رمضان: "الناس محتاجة حد يمثلها في السؤال وهما يسمعوا الاجابة وفكرة الجمل القصيرة والتوجهيات مش بتجيب مع الناس وده نموذج لقطاع من المواطنين المصريين اللي لازم يلفت النظر للسادة المسئولين، وبنقولهم اخرجوا واشرحوا للناس بلا خجل".
