سهير جودة: "إعلان ياسر جلال التبرع رسالة مهمة.. والمصريين أصبحوا أعداء أنفسهم"
أعربت الإعلامية سهير جودة، عن أسفها واستيائها الشديد من هجوم بعض المصريين على الفنان ياسر جلال بعد إعلان الأخير التبرع بمبلغ مالي كبير لصندق تحيا مصر، دعمًا لمصر في ظل الأزمة الاقتصادية التي يمر بها العالم، ووجهت الشكر للفنان ياسر جلال.
وقالت سهير جودة، خلال حلقة اليوم السبت، من برنامجها "الستات"، المذاع عبر فضائية "النهار"، إن ما يحدث الآن يؤكد أن المصريين أصبحوا أعداء أنفسهم، مضيفة: "مستحيل يكون في أي تفسير تاني اننا أعداء نفسنا، احنا بنحب نعترض وخلاص، نعترض من اجل الاعتراض، ياسر جلال بجد قدوة، وهو اتبرع في هدوء، مكلمش صندوق تحيا مصر وقالهم انا هتبرع، كانت مفاجأة ليهم".
رسالة مهمة
وتابعت: "احنا طول الوقت معترضين، لكن اللي عمله ياسر جلال بعيدا عن تطرف تفكير بعض الناس، هو رسالة مهمة جدا ودعوة لكل الفنانين المصريين، ولكل القادرين للتبرع، لأننا في مرحلة صعبة، التبرع مش فرض على حد، ده إحساس، اللي عايز يتبرع باي مبلغ يتبرع، اللي عايز يعلن براحته، ياسر مكنش عايز يعلن، لكنه اتضطر".
واستطردت سهير جودة: "انا شايفه ان ياسر جلال كان لازم يعلن تبرعه، لأن دي عدوى، عشان الناس كلها تتشجع وتتحمس، اللي قادر وعايز واللي شايف إنه ممكن يتبرع يروح يتبرع، ده مش فرض ولا اجبار على حد، احنا هنا بننتقد الشخصيات العامة لو اتبرعوا، ولو متبرعوش بنقول هما ازاي متبرعوش وبيكنزوا فلوسهم ومش بيفكروا في حد خالص".
