السيسي لـ المصريين: "أنتم متعرفونيش في الفلوس.. يا نهار أبيض"
وجه الرئيس عبدالفتاح السيسي، رسالة إلى الرأي العام، قائلا: "في الفلوس مالكوش دعوة سبوني أنا.. لأن هى غلبانة أوي وإن مكناش نحرم نفسينا ونعمل مش هتعمل، والله العظيم أنا صادق معاكم وربنا شاهد عليا، وربنا اللي هيحاسبني ويارب يكون الحساب طيب ويكون ليا أجر عن اللي بنعمله".
وأضاف السيسي، خلال افتتاح مصنعي الغازات الطبية والصناعية ومحطة توليد الطاقة في أبو رواش، اليوم الإثنين، "مش هينفع نمشي بالطريقة دي لازم يكون في أوعية موجودة، وهى بتتعمل صعبة شوية، مهو الكلام ده بيتاخد من نصيب وزارة المالية، الفلوس عندهم تخش تخرج على طول مفيش أمل لازم تخلص، بس لما تكون في الصندوق أمر مختلف، قولت للدكتور مصطفى زي ما عملت فيك سبني أعمل بقا".
وتابع، "يبقا نعمل صندوق لقناة السويس ولا لاء.. وبالمناسبة الصناديق دي كلها محدش يقدر يصرف جنيه غير لما يقولي، وانتم متعرفونيش أنا في الفلوس عامل إزاي يا نهار أبيض، الفقير معندوش غير أنه يخلي باله من كل مليم".
