سهير جودة: ويجز مختلف وبيشارك في أكبر حدث عالمي

هنأت الإعلامية سهير جودة، مطرب الراب المصري ويجز، لاختياره للغناء في حفل ختام نهائي كأس العالم "قطر 2022"، قائلة: "من يدعمه الجمهور هو بالجمهور مكتفي لا يعطله أحد، هو دة ويجز، ويجز هو تلخيص لشباب كتير عندهم أحلام، هو مصدق نفسه وحلمه عشان كده هو بالنسبة للشباب النجاح العصامي اللي بدأ من السوشيال ميديا".

أغنية عز العرب

وأضافت سهير جودة، خلال حلقة اليوم السبت، من برنامجها "الستات"، المذاع عبر فضائية "النهار": "لما الصفحة الرسمية للاتحاد الدولي لكرة القدم أعلنت إن أغنية عز العرب لمغني الراب المصري ويجز  هتبقى إحدى أغاني ألبوم كأس العالم، دي المرة الأولى اللي بيشارك فيها مغني مصري  في الالبوم الرسمي للبطولة، وهو ترند  رقم 2 على يوتيوب، وهنشوفه في حفل ختام كأس العالم".

ملهم 

وتابعت: "ناس كتير جدًا شايفين ويجز إنه نموذج ملهم، وناس تانية شايفين اللي بيقدمه مش غناء، لو ذوقنا الشخصي هنقيس بيه الأحداث هنلاقي حاجات كتير مش فن، وخلينا نقيس بنسبة النجاح والنجومية، اكيد في ناس مصدقه ويجز، هو عنده شئ مختلف، هو حالة مختلفة، ولد ابتدى صغير والنهاردة عنده ٢٤ سنة، وحقق شهرة عالمية واسمه بيتردد باحترام بين النجوم.. إذا هو عنده شئ مميز ومختلف".

الشباب المصري

واستطردت سهير جودة: "أنا قريبة للناس اللي ذوقهم مش ويجز في الأغاني، لكن لازم نحترم هذا النجاح، أغنية عز العرب بالمناسبة حلوة جدا هو كاتب كلماتها، وخلينا ندعم الشباب المصري، وويجز نموذج بيحقق حلم الشباب في النجاح والإنجاز  ، وبيتقبل الاخر، اعتقد الاجيال الجديدة معندهمش تنمر وعنصرية زي اللي  كانت في الأجيال السابقة".

مصطفى كامل: لم أمنع "ويجز" من الغناء في المونديال.. وهو على رأسي

مصطفى كامل: ويجز لم يحضر لنقابة الموسيقيين ولم يحترم الكيان

واختتمت مذيعة "الستات": "مش بالضرورة نكون متفقين كلنا على ذوق واحد، لكن منحكمش على حد بذوقنا الشخصي ونقول ان دا لا يتوافق مع ذوقي فيبقى ايه الذوق ده والفشل دا، خلينا نبقى موضوعيين في الحكم، وشئنا ام ابينا ويجز هو نجم ملهم للجيل الحالي".