حبس مديرة حضانة الإسكندرية.. والد أحد ضحايا تعذيب الأطفال يكشف التفاصيل
كشف محمد تاج الدين، والد أحد ضحايا التعذيب في الإسكندرية، تفاصيل مأساوية بشأن تعرض نجله إلى الضرب من قبل مديرة الحضانة.
وقال "تاج الدين" في اتصال هاتفي ببرنامج "من الجاني" المذاع على فضائية "الحدث اليوم": "الحضانة موجودة في منطقة راقية في منطقة الأزاريطة بالإسكندرية وبها شركات ملاحة وبنوك ".
وأضاف "ابني عنده 3 سنين و10 شهور الولد من ساعة ما راح نفسيته تعبانة مبقاش يتكلم كتير يقوم مفزوع من النوم، بقى عدواني وممكن يمد ايده على مامته بيعمل تصرفات مش طبيعية".
وتابع "يوم الجمعة لقيت حد بيكلمني من النيابة وهو أحد أولياء الأمور وقالي اكتشفنا حفلات تعذيب لأولادنا ومعانا التسجيلات وساعتها بدأت افهم ايه اللي كان بيحصل".
واستطرد "روحت أنا ووالدته والطفل على القسم واجتمعنا مع أولياء الأمور ومشينا في الإجراءات وتقديم بلاغ إلى النيابة، ابني كان عنده كدمة بسيطة على ايده وهو بقاله شهر فقط في الحضانة".
وأردف "هي كانت بتختار الأطفال اللي مبيتكلموش وتضربهم وده اللي عرفناه من المدرسات، هي عندها مشكلة نفسية وتصرفاتها كلها سادية لما اتقابلنا لاقينا الأعراض كلها متشابهة عند الأطفال والحمد لله طلع لها قرار حبس على ذمة التحقيقات".
