"الستات" تهنئ شريهان بعيد ميلادها: قاهرة المستحيل ووجه يزيده الحزن سحرًا
هنأت الإعلاميتان سهير جودة ومفيدة شيحة، الفنانة شريهان، بمناسبة عيد ميلادها، الموافق 6 ديسمبر، مؤكدين أن شريهان "أكثر مثل شوفناه لإنسانة بتحب التحدي وبتحب المستحيل، بتعمل المستحيل".
مواجهة المستحيل
وأضافت سهير جودة، خلال حلقة اليوم الثلاثاء، من برنامج "الستات"، المذاع عبر فضائية "النهار": "شوفنا عندها معجزتين حصلوا في حياتها، وخرجت منهم، وكل معجزة قادرة تنهي أي حد، لكن واضح إنها محترفة في مواجهة المستحيل، وبتستمتع بعبور الحواجز واحد بعد التاني".
وتابعت سهير جودة: "دايما تلاقي عنقها مرفوع في الصور كإنه ا العنقاء اللي بتبتدي من أول وجديد، وهي قمر و نموذج لبنات كتير وستات كتير بشكلها وشعرها وحركاتها".
سر الأيقونة شريهان
ومن جانبها، قالت الإعلامية مفيدة شيحة: "شريهان درس كبير في الحياة، ومحتاجين إنه هو يدرس"، لافتة إلى أن هذا الدرس بدأ معها مبكرًا في صغرها، ولم تستنجد بأحد، ولم تلجأ للصعبانيات، موضحة أن قوتها سر أنها الأيقونة.
وأضافت أن "شيريهان بكل ما مرت به، من وفاة أخوها وحادثها ووفاة والدتها، وإصابتها بالسرطان، لكن كانت جريئة وقدرت تاخد قرار بالعلاج، وكأنها بتحاول تدينا درس إننا نحترم الصعوبات اللي بتواجهنا في حياتنا"، مضيفة أن آخر شيء كان إنجابها للبنتين، رغم صعوبات إنجاب البنت الثانية.
العنقاء تخلق نفسها من الرماد
وتابعت سهير جودة، أن "شريهان شئ مختلف تمامًا، حالة لوحدها يعني زيها زي العنقاء اللي بتخلق نفسها من الرماد وتعيد تاني بناء أسطورتها دون الحاجة لأحد، مفيش حد اختلف على شريهان فنيًا، وهي بتبعد وتستسلم في صمت، هي بتعود وتبدأ من جديد وكأنها بتبني أسطورة جديدة".
واستطردت: "شوفناها في إعلان في رمضان السنة اللي قبل اللي فاتت، وشوفناها في مسرحية كوكو شانيل، هي كأنها جوهرة حقيقية بجد، بتعمل وجود خلاق طول الوقت، بتخلق من كل نهاية بداية جديدة، وكل نهاية هي بتكون على القمة دايما".
قاهرة المستحيل
واختتمت: "شريهان مرت بأربع امتحانات كبرى في حياتها لكنها قاهرة للمستحيل، أكيد مرت بدعوات وحب الناس، شريهان عندها وجه لا يخطئه الحزن وربما يزيده سحرا، حزن غامض يمكن كلنا منفهموش ولكنه لائق عليها لأنه صادق، وخلف هذا القناع هناك حقيقة رائعة جدا".
