السيسي: مبادرة "حياة كريمة" حلم للدولة منذ سنوات.. وداخلة في سبق مع هذه التحديات
قال الرئيس عبد الفتاح السيسي، إن مبادرة حياة كريمة كانت حلم تريد الدولة تحقيقه من سنوات طويلة للتدخل وحل أزمات القرى التي تعاني من قلة الخدمات بها.
وأضاف "السيسي" خلال تفقده جامعة المنصورة الجديدة: "يهمني وإنتوا من أهل المحافظة تقولولي رأيكوا ايه في حياة كريمة لأننا بنشتغل، وهذه المبادرة كبرنامج الدولة تنفذه والبعض بيشوف في حياة كريمة اللي كانت الدولة عايزة تعمله من سنين طويلة بدليل وضع خطة للصرف الصحي في القرى".
وتابع "الفكرة مش أننا بنعمل الفكرة أو أننا بنقول ليه متعملش كده، قبل كده كان إجمالي الصرف الصحي في القرى 11% ولذلك الدولة تحاول تعمل هذه المبادرة ولكن كان يقابلها تحديات".
واستطرد "التحدي الأول يتعلق باستقرار المسار بمعنى تقدر تحط خطة ولما تنفذها تنجح، مكنتش تقدر تكمل فيها لأن فيه تكلفة غير مستقرة لمدة سنة أو اتنين أو ثلاثة التكلفة تختلف وحجم التمويل المطلوب كان ضخم ثم نواجه مشكلة التخطيط اللي بيكون على ألف وبعد سنة بقوا 1050 فتلاقي المبادرة داخلة في سبق مع التطور والتكلفة".
وأردف "إحنا قولنا إننا هنحاول ننتهي من هذه المبادرة خلال 3 سنوات، وإحنا كنا محددين نخلص المرحلة الأولى خلال سنة مقدرناش لأن الظرف الاقتصادي كان له تأثير بسبب تداعيات الأزمة الروسية، وفوجئنا أن قدرة الشركات مع حجم النشاط مش قادرة تدخل تخلص ده في سنة".
