اللواء طيار أحمد المنصوري يكشف تفاصيل "مناورة الموت" الأخيرة بحرب أكتوبر (فيديو)
كشف اللواء طيار أحمد المنصوري، أحد أبطال حرب أكتوبر 73، تفاصيل عن مناورة الموت الأخيرة، موضحًا كيف استخدمها للنجاة من طيار إسرائيلي.
وقال "المنصوري" خلال حواره ببرنامج "نادي النساء السري" المذاع على فضائية "الشمس" مساء اليوم الخميس: "مناورة الموت الأخيرة كانت قبل معركة المنصورة".
وأضاف: "هذه المناورة يتم تدريسها نظريًا لأن نسبة النجاح فيها تقريبًا صفر، بيقولوا يعني لما تقع والطيار جاي هيضربك وينشن عليك اعمل المناورة دي احتمال تنجو".
وتابع: "يلزم في هذه المناورة 6000 قدم علشان تنزل وترجع تاني لما لقيت الطيار الاسرائيلي جاي بيضربني بصيت إلى الله وقولتله يارب إيدك معايا أنا بقاتل في سبيلك، مش عايز أموت على إيد الخروف ده".
واستطرد: "ونزلت لقيته 3 آلاف قدم بصيت لربنا تاني قولتله يارب طلعت الطيارة، والطيار الإسرائيلي لو جه ورايا وطلع هيموت وأبقى نجيت حتى لو مت لأني مكنتش عايز أموت على إيده، لقيت العفار ونخلتين وكأن الملائكة الشداد الغلاظ اللي كانوا بيقاتلوا معانا ولا سيدنا جبريل ولا جعفر الطيار".
