برنامج الستات: "الزواج مش محكمة.. وبلاش ندمر ما تبقى من الأسرة المصرية"
أكدت الإعلاميات مفيدة شيحة وسهير جودة، اليوم السبت، على رفضهن للجدل الدائر مؤخرًا بشأن "حصول المرأة على مقابل خدمة بيتها وزوجها"، مؤكدين أن هذه الأفكار تدمر ما بقي من الأسرة المصرية، وأن الزواج هو قبول وإيجاب وليس محكمة.
جدل حول دور المرأة
وقالت الإعلامية مفيدة شيحة، خلال برنامج "الستات"، المذاع عبر فضائية "النهار"، مساء اليوم السبت: "بقالنا كام يوم، الدنيا قايمة مش قاعدة بسبب تصريحات لعدد من الشخصيات عن شوية حاجات كدا المرأة مش ملزمة بيها، زي إنها؛ مش ملزمة تخدم جوزها، مش ملزمة تطبخ له، مش ملزمة تقوم بالأعمال المنزلية بشكل عام يعني، وكانت أكتر حاجة مثيرة للجدل إنها مش ملزمة ترضع ولادها، وإذا عملت كدا تاخد أجر".
جدل وانقسام
وأشارت مقدمة برنامج "الستات" إلى أن هذه "التصريحات عملت جدل وانقسام كبير جدًا في المجتمع، حتى عند الستات نفسهم، شوفنا طرف مبسوط بالتصريحات دي وشايف إن المرأة مش ملزمة وإنها بتعمل دا كنوع من التفضل على الرجل، وفي المقابل فيه ستات تانية شايفة إن الست بتعمل الحاجات دي بالفطرة، مش علشان مجبرة عليها".
وقالت الإعلامية سهير جودة، إن المسألة طرفين لديهم أراء حادة، ونحتاج إلى رأي ثالث، مؤكدة على أن الزواج ليس محكمة بين الطرفين وبعضهما البعض، وأنه يقوم بالأساس على الرضا والقبول والمودة.
مصلحة المرأة
وتابعت مفيدة شيحة: "أما الرجالة بقى فبعيدًا عن كام واحد يتعدوا على صوابع الايد الواحدة، شايفين إن الست فعلا مش ملزمة بالحاجات دي، فالأغلبية شافت إن الست لو شايفة إن كل اللي بتعمله في بيتها نوع من التفضل على الرجل، أو إنه مطالب يدفع أجر على كل حاجة بتعملها الست في البيت، يبقى إيه لازمة الجواز نفسه، وهنا بقى هو الخطر".
وتابعت مقدمات برنامج "الستات": "علشان كدا بنطرح سؤالنا النهارده اللي بيقول: هو لما بيتقال للست على حاجات معينة "دا حقك ولازم تاخديه".. بتكون فعلا نصيحة علشان مصلحتها وتاخد حقوقها المهدرة ولا فخ ممكن بسببه يحصل خراب في بيوت مستقرة؟".
