مصطفى بكري يناشد الرئيس السيسي بإجراء تعديل وزاري (فيديو)
أكد الإعلامي مصطفى بكري، أن الشعب المصري يحرص على دعم بلده في مختلف الأزمات.
أزمات عاشها المصريون
وقال بكري خلال برنامجه "حقائق وأسرار"، المذاع عبر فضائية "صدى البلد"، مساء اليوم الخميس، إن "المصريين في وقت الجد بيتحركوا بجيناتهم عشان يكونوا مع البلد، بينسوا الجرح الخاص ويلتفوا حول القضية العامة"، متابعًا "تاريخ مصر ملئ بأزمات كثيرة عايشها المصريون، فيه حلف موجود في البلد اسمه حلف إزاي تخرب البلد وتعمل احتقان مجتمعي، دايما الشعب هو الحامي لينا، الأنظمة بتروح وتيجي لكن مؤسسات الدولة العميقة هي التي حمت مصر من كل المؤامرات وآخرها مؤامرة جماعة الإخوان الإرهابية".
وعي الشعب المصري
وأضاف مصطفى بكري "الشعب المصري واعي وعارف الصح وغلط، محدش هيزايد على الشعب المصري، اللي بيعاني، الدولة والرئيس عارفين إنه بيعاني، عشان دخلنا في إصلاحات "اقتصادية كانت ضرورية وإلا كنا وقعنا"، مردفا "كلنا وقفنا واخترنا الرئيس رغم إنه مكانش عايز، وأخد تكليف من الشعب إنه ينسينا الهم اللي عشناه سنين طويلة، فيه ناس في الحكومة بتنكد علينا حياتنا وبتصدر رئيس دولة في الواجهة".
حلف فساد
وتساءل مصطفى بكري: "إزاي فيه حلف معين مهمته التكويش على كل شئ، القراءة الصحيحة للواقع تقول إنه لازم يكون فيه تعديل وتغيير في الحكومة، فيه ناس لازم تمشي ونسمع الشعب عايز يقول إيه، عشان بلدنا وعشان اللي حصل قبل كده ميتكررش، الرئيس قال قبل كده الناس لو خرجت هتهدم كل حاجة، الرئيس بيقرأ الواقع وشايفه، فيه حلف فساد وتحريض ووزراء واخدينها تكية، محتاجين من الرئيس ثورة على كل دول عشان مصر"، معلقا "محدش هيزايد على موقفي ودعمي للرئيس والدولة، كل حاجة مش تمام، الشعب منسيش إن الرئيس السيسي خلصنا من الإخوان والظلم، والله لو مر يوم 4 يوليو كنا هندخل حرب أهلية".
