"هيسألك هتورثي كام".. مفيدة شيحة توضح مواصفات الرجل البخيل
تحدثت الإعلامية مفيدة شيحة، عن صفات الرجل البخيل، متسائلًا: "هل الراجل البخيل بيتعرف قبل الزواج؟، وإزاي تعرفي الراجل البخيل؟، وكيف ينعكس بخل الآباء على نفسيه الأبناء؟، وإزاي تتعاملي مع الراجل البخيل ومحاوله تغييره، والبخل العاطفي وأشكاله عند الرجل".
الراجل البخيل مبيتعرفش قبل الجواز
وقالت شيحة خلال تقديمها برنامج “الستات”، المذاع على قناة “النهار” إنه:"أنا بقى شايفه ليه الراجل البخيل مبيتعرفش قبل الجواز، عشان كله بيبقى حاطط الماسك الجميل والرجل الكيوت على وشه وعلى كل صفاته قدام الحد اللي بيحبه.. بيتجمل ويحاول يظهر الراجل الجان الشيك السخي.. وتلاقيه عادي جدا يجبلك هدية ويخرجك، بس احنا بردو هنفقسه ونقولك على حاجات تقدري تعرفي من خلالها الراجل ده بخيل ولا لأ".
“انسي إنه يعزمك على الأكل برا”
وأضافت مفيدة شيحة، أنه:"بسم الله الرحيم كده وفتح كلام.. انسي إنه يعزمك على الأكل برا في أي مطعم سواء بقى مطعم غالي أو عادي.. الفكرة أصلا مش مطروحة بالنسباله ولو حصلت تبقى مرة مرتين بالكتير أوي في السنة وتلاقي كل مرة تفتحي معاه كلام يرد يقولك "أنا متغدي في البيت ومبحبش الأكل بره البيت، ولو حصل وخرجك مرة في أي مكان تشربوا عصير ولا حاجة.. هتلاقيه بيرفض فكرة البقشيش في أي مكان".
“هتلاقيه يقولك أنا محتاج ست مش مسرفة”
وتابعت أن: "هتلاقيه يقولك أنا محتاج ست مش مسرفة.. لأن الراجل البخيل عامل زي الطفل اللي بيخاف على حاجاته فبيحاول دايما إنه يأخد وعد بعدم الاقتراب من أمواله وإنك تحافظي عليها، وتلاقيه كمان بيتكلم عن الفلوس دايما وأنه مبذر وهو العكس تماما... ويسألك عن أحوالك المادية وأحيانا أملاك أهلك ولو كان بجح بقى تلاقيه سألك هتورثي منهم إيه".
