تامر أمين بعد الاستقبال الأسطوري لمدرس الفلسفة: "تقولش رئيس وزراء أو جمهورية" (فيديو)
علق الإعلامي تامر أمين، على مقطع الفيديو التي انتشر مؤخرًا عبر مواقع التواصل الاجتماعي لمدرس فلسفة في موكب وبودي جاردات واستقبال أسطوري لهذا المدرس بأحد مراكز الشباب.
عيد ميلاد أو سبوع كورونا
وقال "أمين" خلال تقديم برنامجه "آخر النهار" المذاع على فضائية "النهار" مساء اليوم الأربعاء: "ده عيد ميلاد أو سبوع كورونا معمول هنا".
وأضاف "ده درس خصوصي مراجعة نهائية لمادة الفلسفة والمنطق لطلاب الثانوية العامة وهذا المدرس ومش هقول اسمه علشان ميبقاش دعاية له ده أشهر مشهور".
هذه المشاهد في مواكب الشخصيات العامة
وتابع "ده قال تعالوا نعمل مراجعة جاله كل طلبة الثانوية العامة شعبة الأدبي مجهزة كاميرا درون وهو اللي مصوره وهو اللي عامل برومو وهو داخل بالبودي جاردات تقولش رئيس وزراء أو رئيس جمهورية".
واستطرد "هذه المشاعد بتشوفها بس في مواكب الشخصيات العامة، ده لو داخل انتخابات مش هيعمل كده، ده لو داخل كأس العالم في الفلسفة والمنطق مش هيعمل كده".
وأردف "الناس في السوشيال ميديا منقسمة ما بين اللي بيقولوا والله برافو عليه لما يكون مدرس شاطر وقدر يقنع كل هؤلاء الطلبة يحضروا المراجعة ده واحد شاطر وجامد أوي وخلى آلاف الطلبة يجوا يحضروا".
سؤال لوزارة التربية والتعليم
ووجه تساؤلًا إلى وزارة التربية والتعليم "هل هذا المشهد قانوني ولا غير قانوني وهذا التجمع الرهيب والدرس الخصوصي والمراجعة هل ده يعتبر دروس هل ده صح ولا مش صح وهل يتفق مع القانون ولا مخالف له".
