شيرين عبد الوهاب تشن هجومًا ناريًا على حسام حبيب
مازحت الفنانة شريين عبد الوهاب، الإعلامية لميس الحديدي، مطالبة في مداخلتها معها مخرج البرنامج ألا يضع صورتها حليقة الرأس على الشاشة، وأن يضع صورتها بالشعر الطويل، قائلة: "يا راجل حرام عليك، حط صورة حلوة، ده أنا شبهي وأنا شعري قصير، زي الشاويش عطية".
وتابعت "عبد الوهاب"، خلال مداخلة هاتفية مع الإعلامية لميس الحديدي، المذاع على فضائية "on"، مساء الثلاثاء: "أنا مش هنسى سؤالك عليا وقت الأزمة، ولا الفنانة ياسمين عبد العزيز ولا منة شلبي وكل الناس الحلوين اللي سألوا عليا والجمهور، وبقول للناس أنا آسفة إني بتكلم في موضوعي الشخصي، وأنا عارفة أن الناس في البلد عندها مشاكل أهم وأنا بقيت بحس إن الموضوع بوخ".
شيرين تعتذر لجمهورها على الهواء
واعتذرت شريين عبد الوهاب لجمهورها على الهواء قائلة: "عاوزة أستغفر ربنا على الكذب اللي كذبته عشان أخلي صورة إنسان تبقى كويسة، وأنا كذبت ودي أكتر حاجة ربنا ما يحبهاش هي الكذب وأنا محبوش".
كذبت على جمهوري لتحسين صورة شخص قد يتزوج في المستقبل
وسالتها الحديدي كدبتي في إيه؟ لترد: "كدبت في حاجات كتيرة أوي، لإني بنت أصول، وكنت عاوزة أرفع صورة إنسان ممكن يروح في يوم من الأيام يتجوز من عيلة تانية وأخلص منه، ولو كنت قلت كلام وحش وقتها مكنش هيعرف يتجوز، وأنا نفسي يتجوز ويغور ويبعد عني".
وعقبت "الحديدي": "مش كنا خلصنا من الموضوع ورجعتي لحياتك، ودافعتي عنه كتير؟، لترد: "أنا ست قاعدة في أمان الله مع بناتي، بقالنا 4 سنوات شايفين الويل، سافرنا الساحل، وقلنا نقعد أربع أو خمس أيام، ونرجع مبسوطين وتتحسن نفسية البنات ونفسيتي ومكناش بنخرج ومكناش عايشين تقريبًا، والبنات مكنوش بيعرفوا يقعدوا معايا".
شيرين عبد الوهاب: كنت أعيش مثل الفئران
وأضافت: "مكنوش عارفين يقعدوا معايا، لإني كنت عايشة مع زوج مش بيشتغل تقريبا، وكنت محبوسة 24 ساعة في أوضة نومي مش بعمل حاجة قاعدة بس، وأنا غلطت في حق نفسي، وفي حق شيرين عبد الوهاب، لكن في نفس الوقت مكنش عيب أن شيرين عبد الوهاب المشهورة الست المتجوزة تحاول تحافظ على بيتها، اكتشتفت أنه مكنش بيت كانت عيشة فئران أو مصيدة، أنا كنت زي الفار اللي بيدخل المصيدة ياكل حتة جبنة".
حسام حبيب لم يكن يعمل فترة زواجي بي
تابعت: "كنت عايشة مع راجل مش بيشتغل، ولا بيخرج ولا بيشوف أهله، ولا أصحابه وكل همه حب الامتلاك، ومع ذلك فضلت جمبه، وهو لايعرف إلا فكرة حب الامتلاك، وصبرت لإني كنت بحاول أنجح الحب ده، ومكنتش بحب أتهزم، وأنا بطبعي أكون خدامة الرجل اللي أعيش معاه".
حسام حبيبي أقنعني أن الدنيا بالكامل تتآمر عليا
استطردت: "لقيت نفسي بعد فترة كورونا بدمر، وشغلي بيقف اللي كنت معتمدة أنه يخلصه، ماعملش حاجة وهو شخص مودي جدًا، وخسرني كل الناس، أخويا وأختي وأمي وأصحابي والسائق والشغالة، كل الناس خسرهملي وكان بيعتقد أن كلهم متآمرين عليا، واقتنعت أن الدنيا متآمرة إننا مانبقاش مع بعض، وهو للأسف لازم يتعالج نفسيًا لإنه مريض بيحب الامتلاك".
