بعد الهجوم عليها.. عروس كفر الدوار: "ميرضيش حد اللي حصل فيا ده"
علقت أمنية طارق، عروس كفر الدوار، على الجدل المثار عليها على مواقع التواصل الاجتماعي، بعد فيديو كتب الكتاب الذي نشرته.
وأوضحت أنها لم تكن تخطط للكلام الذي قالته خلال توقيع عقد زواجها، قائلة: "كنت عايزة أفرح جوزي بكلمتين وحبيت أفرحه بطريقتي وتفاجأت بهجوم الناس ومعملتش تصرف غلط ومش عارفه في إيه وأهلي وجوزي متبهدلين من التعليقات السلبية على السوشيال ميديا".
وعبرت طارق، خلال مداخلة هاتفية ببرنامج "حديث القاهرة"، مع الاعلامية كريمة عوض، على قناة القاهرة والناس، عن استيائها من حالة الهجوم التي تتعرض له منذ انتشار الفيديو، قائلة: "ميرضيش حد اللي حصل فيا ومضيقتش حد في حاجة عشان اتهاجم بالشكل ده، والفيديو نشرته عندي للذكرى وبعد ما اتشير اتبهدلت".
وتابعت: "بنشوف فيديوهات ناس بتحضن بعض ومفيش حد بيعلق هل الحضن حلال قدام الناس وأنا كلامي وحش قدام الناس، وحمايا كان واقف ورايا وفي ضهري، وإحنا ناس عاديين ولا طالبين ترند والكلام مأثر علينا نفسيا"، مؤكدة أنها وزوجها يقدران أهلهما كثيرا.
