عروس البحيرة عن مقولتها بعقد قرانها: "ده طلب مش شرط" (فيديو)
قالت أمنية طارق، عروس البحيرة صاحبة مقولة "تشيل أهلي في عينيك"، إنها لم تكن تتوقع الضجة التي أثيرت حولها بمواقع التواصل الاجتماعي، معقبة: "أنا واخدة زوجي عن حب وكنت عايزة أقول للناس كلها أني اخترت صح".
وأضافت "طارق"، خلال مداخلة هاتفية مع برنامج "كلام هوانم"، المذاع عبر فضائية "الحدث اليوم"، اليوم الأحد، أن مقولتها لم تكن شرط على العريس، معقبة: "شرط إزاي وأنا بقوله هطلب منك طلب، أنا بطلب منه مش بشرط، وخليت الطلب ده يوم كتب الكتاب علشان يكون إشهار وإني أقوله قدام الناس قد إيه هو راجل كويس ومحترم وأهله ناس كويسين".
وتابعت عروس البحيرة صاحبة مقولة "تشيل أهلي في عينيك"،: "أنا وحيدة أمي وحبيت أشكرها وأقوله خلي بالك منها هي مالهاش غيري وأنا ماليش غيرها، اللي مالوش خير في أهله مالوش خير في حد، وهو قالي أهم حاجة رضا أمي عليكي، وإن كان هو شايل أهله على راسه وبيقدسهم أنا كمان بقدس أهلي جدًا، والمفروض تكونوا مبسوطين بينا إننا ناس كويسة وبتحب اهلها والعائلتين مش مضايقين من بعض" مردفة لزوجها وأسرته: "أنا بشكركم جدًا على وجودكم في حياتي أنا اخترت وهتفضل يا أحمد اعظم انتصاراتي في الحياة".
وأثارت الشابة أمنية طارق المعروفة إعلاميًا بـ "عروسة البحيرة" حالة من الجدل عقب ظهورها في مقطع فيديو جرى تداوله على نطاق واسع عبر شبكات التواصل الاجتماعي خلال عقد قرانها.
وظهرت أمنية خلال عقد قرانها وهي توصي زوجها بعدة وصايا جاء فيها: "أنا واثقة في ربنا وفيك إنك هتكون خير السند وخير الصاحب، مندمتش يوم في اختيارك، بل بالعكس أنت أكبر وأعظم انتصاراتي، هطلب منك طلب، زي ما هشيل أهلك في عيني، تشيل أهلي في عينك الصغير قبل الكبير، ومع احترامي للكل أمي ثم أمي ثم أمي، مش هسيب أهلي بالساهل".
