ابنة سعيد صالح تكشف تفاصيل مكالمة عادل إمام لها (فيديو)
كشفت هند سعيد صالح، كواليس المكالمة الهاتفية التي تلقتها من الزعيم عادل إمام والتي كتبت تفسيرها في منشور عبر مواقع التواصل الاجتماعي مؤخرًا.
وقالت "هند سعيد صالح" خلال مداخلة هاتفية مع الإعلامي يوسف الحسيني ببرنامج "التاسعة" المذاع على "القناة الأولى المصرية": "أنا أسفة إني عملت الدوشة دي فجأة لقيت الناس كلها بتتكلم الموضوع مش مفاجأة، ولكن التوقيت كان بالنسبة ليا مفاجأة".
وأضافت: "عادل إمام في حياتي طول عمري والحدث إني بقالي فترة في أشد الاحتياج لبابا مستنية بابا في حلم فلما آلاقي المكالمة جت من غير مناسبة من غير عيد أو من غير ذكراه حسيت إن أنا بكلم بابا فعلا، والمفاجأة أنه كلمني من رقم مرات رامي وقالتلي انتي نايمة قولتلها لا قالتلي طيب خدي كلمي مش قادرة اقولك أنا فرحة ازاي كانت فرحة العبيط بجد".
وتابعت: "قالي تعالي وحشتوني وقولتله عندي ابن خلص امتحانات والتاني أول ما يخلص هجيبه وأجي وأنا كنت محتاجة ده والله كنت محتاجة طبطبة. هو بالنسبة ليا عمو عادل إمام فعلا من ريحة الحبايب وسر المكالمة طبطب عليا وهذا مش معناه إنه مكنش بيسأل عليا".
وبسؤالها عن تفاصيل حالته الصحية قالت ابنة سعيد صالح: "صوته حلو اللي احنا عارفين مش تعبان العادي وقالي مبتجيش ليه يا بنت انتي وقولتله هخلص امتحانات وهجيلك".
