السيسي يفاجئ على الهواء سيدة طلبت مقابلته.. والأخيرة: قلبي هيقف من الفرحة

استجاب الرئيس عبد الفتاح السيسي، لطلب السيدة محروسة، من ذوي الاحتياجات الخاصة، تبلغ من العمر 42 سنة، تعمل على تروسيكل، التي طلبت أن تسمع صوته وتُسلم عليه.

وقال الرئيس خلال مداخلة هاتفية في برنامج "من مصر"، المذاع على قناة "cbc "، موجها حديثه لمحروسة: "ما هو مش ممكن أبدًا أقول لأ للست محروسة، أو بنتي اللي تقول أنا نفسي أسلم عليه، ده أنا اللي يشرفني أني أكلمك".

وأضاف "أهنيكي وأقولك يا بنتي احنا متابعينك لوفائك، وربنا يطرح البركة في جهدك، ويطرح البركة في أولادك، اسمحيلي أن كل اللي أنتِ بتتمنيه كبنت، ليا أني أوقف جنبك، والله الست المصرية دايما مثل عالي، وأرقي نموذج محترم.. أنا بتشرف بيكي وبجهدك، أنا تحت أمرك، ادعيلي، وربنا يخلي ولادك أحمد ونورهان، ربنا يخليهملك وتفرحي بيهم، ويبارك فيكي.

وتابع: " أنتي كمان أوعي تحرمينا من دعواتك الطيبة، يا رب يقبل منك ويباركلك، أنا سعيد أني بهنيكي أنك نموذج جميل لكل ست مصرية، واسمحيلي كل شيء هنعمل كل شيء، ربنا يعوض عليكي".

من جانبها، قالت السيدة محروسة متأثرة: "ربنا يجازيك خير يا ريس على اللي انت بتعمله لذوي الإعاقة.. فعلًا أنت كتبت شهادة ميلادنا.. أنا مش عارفة أقول أيه... ربنا يبارك في عمر الرئيس".

وتابعت: "الدنيا مش سيعاني أن بسمع حضرتك وبتكلم معك.. أنا قلبي هيقف من الفرحة.. ربنا يجازيك خير".