ياسمين عبد العزيز تحكي عن أغرب رسالة جاتلها من التربي (فيديو)

كشفت الفنانة ياسمين عبد العزيز، عن أغرب رسالة جاءت لها أثناء مرضها خلال فترة تدهور حالتها الصحية مؤخرًا.

وقالت "ياسمين عبد العزيز" خلال حوارها مع الإعلامية منى الشاذلي ببرنامج "معكم" المذاع على فضائية "سي بي سي": "جاتلي مسدج اول مرة يبعتلي التربي، انا عادة بحب اروح الترب".

وأضافت "بعتلي فيديو وهو بيجهزلي الترب وأنا كنت في حالة حسيت إنها رسالة إني بموت فعلًا، أنا مش خايفة من الموت عند ربنا احسن أنا شايفة أن الواحد لما يموت أحسن من الحياة اللي احنا عايشنها".

وتابعت "كل مشكلتي كان ولادي وأنا حاسة اني بموت، وكنت بفكر بس وأنا داخلة أعمل ثالث عملية هل أنا عملت كويس وشريط كل اللي فات قعد يدور قدامي".

وكانت كشفت ياسمين عبد العزيز، لأول مرة عن تفاصيل أزمتها الصحية التي تعرضت لها مؤخرًا، قائلة "كنت داخلة اعمل عملية عند دكتور النسا اللي ولدني في بنتي والعملية دي عبارة تكيس في المبايض".

وأضافت "هذه العملية مش أول مرة أعملها أنا عملتها خمس مرات قبل كده وكنت بعملها وبأخذ وقتي واطلع على شغلي ومحدش يعرف حاجة لأن دي شخصيتي مبحبش حد يعرف اني تعبانة".

وتابعت "روحت للدكتور كنت لسة مخلصة المسلسل اللي مشفتش يوم فيه انبساط من بعد ما خلصته، جالي مرتين كورونا وبعدين التعب ده".

واستطردت "دخلت اعمل العملية ومحدش يعرف وكان معايا احمد وبنتي وصاحبتي نفين، وبعد ما طلعت من العملية كان فيه آلام رهيبة وعمالة أصوت أنا بموت ومفيش أي مسكنات أو مخدر مأثر فيا".

وأردفت "بعدها اتقالي لو معملتش العملية كمان ساعة هموت لأن طلع القولون اتخرم وجالي تسمم في الدم وأنا كنت بموت فعليًا".