فتاة العياط: "كان عايز أعز ما ليا.. ومش هعرف حد تاني" (فيديو)

عقبت أميرة أحمد، والمعروفة إعلاميا بـ فتاة العياط، على ما تعرضت له من اتهامها بالقتل دفاعا عن الشرف، قائلة: "زعلانة من اللي حصل، ومكنتش أتخيل أن كل ده يحصل.. بجد أنا غلطانة، وبعاقب نفسي على غلطتي وأني طلعت من البيت من غير ما أقول لأبويا".

وأشارت "أميرة"، خلال برنامج "90 دقيقة" المذاع عبر فضائية "المحور"، اليوم الأربعاء، إلى أنها قضت فترة صعبة في الحبس، مضيفة: "كنت تعبانة، وبحلم أحلام وحشة، واليوم كان بيعدي عليا سنة"، لافتة إلى أن اللحظات التي قضتها أثناء الحادثة لن تنساها، معلقة: "كان عايز مني أعز ما ليا، وطلب مني حاجة مش كويسة، ومكنش ينفع أعمل كده".

وأضافت فتاة العياط، "أنا بشكر ربنا أنه أنقذني"، موضحة أنها وصلت لمنزلها الثالثة فجرا بعد إخلاء سبيلها، وكانت سعيدة لعودتها لأسرتها من جديد، موجهة رسالة للفتيات: "حافظوا على نفسكم، واتعلموا من الدرس اللي شفته، والأيام اللي مريت بيها، وبلاش تثقوا في حد.. أنا مش هعرف حد تاني، واللي عايزني يطلب إيدي من بابا، وغلطة عمري إني وثقت في حد معرفهوش".