مدير "57357": "معندناش واسطة في المستشفى"

علق الدكتور شريف أبو النجا، مدير مستشفي 57357، على فيديو نشر للطفلة أحلام ومحاولة اقتحام أهلها المستشفي لكى تتلقى العلاج بها، بقوله: "الفيديو منذ 3 أسابيع، وهؤلاء مجموعة ناس جاءوا الساعة 3:30 الظهر، وأنا كنت واقف بره المستشفى عشان أتابع الإنشاءات، ولقيت الناس جاية في 4 عربيات وتكاتك، وعايزين يقتحموا المستشفى".

وأشار "أبو النجا" خلال مداخلة هاتفية مع الإعلامي خالد صلاح ببرنامج "على هوى مصر" عبر فضائية "النهار وان"، إلى أن "العيادات الخارجية بالمستشفى تغلق من الساعة 12 الصبح، وذلك لأننا نأخذ العدد اللي بنقدر عليه، عشان عدد السراير محدود جدا، ومنقدرش نأخد كل العيانين، وربنا يكون في عون الناس، لأن كل واحد عايز يأخد علاج مجاني محترم وبكرامة جوه المستشفى، ولكن هؤلاء الناس حاولوا اقتحام المستشفى، وإحنا معندناش الكلام ده". 

وأضاف أبو النجا: "إحنا معندناش واسطة، وكل واحد بيدخل في دوره، وإحنا أخدنا البنت وكشفنا عليها في الطوارئ وطلع معندهاش سرطان وراحت مستشفى أبو الريش ولغاية دلوقتي مش عارفين هي عندها إيه لأن عندها مرض نادر من أمراض المناعة".

يذكر أهل الطفلة أحلام جاءوا للمستشفى بناء على توصية من أحد رجال الأعمال، وهذا ما رفضه تماما الدكتور شريف أبو النجا مدير مستشفي 57357.