"موسى" لـ الأولى بالثانوية العامة: "مش هاناخدك بذنب أبوكي"
هنأ الإعلامي محمد موسى، الطالبة أميرة العراقي، معربًا عن تأثره وحزنه لسماع مكالمتها مع قناة مكملينالإخوانية، قائلًا: "من حقك أبوكي يشاركك فرحتك، ووجود الأب مع بنته في هذه اللحظة شئ لا يعوض، لكني هاحكيلك حكاية 4 أميرات نجحوا واتفوقوا كان نفسهم يكونوا موجودين معاهم، لكن الأميرة الاولي أبوها استشهد في رفح وهو بيفطر ساعة الآذان، وكلنا عارفين كويس مين قتل أبوها وليه وإزاي".
وأضاف "موسى"، خلال تقديمه برنامج "خط أحمر" عبر فضائية "الحدث اليوم"، اليوم الجمعة، "الأميرة التانية أبوها مات سنة 2013، يوم ما الإرهابيين فجروا مديرية أمن الدقهلية في بلدك، وأنتى عارفة مين اللى فجر المديرية، وكان شمتان وبيرقص من الفرحة، الأميرة الثالثة كانت وحيدة وقرة عين أبوها، لكن أبوها استشهد في مجزرة قسم كرداسة، واتمثل بجثته بعد ما مات، وكلنا عارفين مين عمل كده في أبوها، ومين رمي عليها ماية نار، والأميرة الرابعة وحيدة أبوها، وأبوها ملحقش يفرح بنجاحه، لأنه مات في أحداث الإتحادية بعد ماولعوا فيه ومثلوا بجثته، فاكرة أحداث الاتحادية وضحايا اللى مرشد الإخوان قال عنهم قتلاهم في الجنة وقتلانا في النار".
وتابع: "لو دول أبائهم رجعولهم ساعة واحدة، أوعدك أبوكي هايرجعلك، ووزير التعليم هايتصل بيكي يهنيكي، وإحنا كمصريين مش هانزعل من الكلام اللى قولتيه على بلدك ورئيسها وحكومتها، أنتي عندك امل أبوكي يرجعلك، لكن دول أبوهم مش هايرجع تاني، وإحنا مش هاناخدك بذنب أبوكي، ومبروك ليكي النجاح".
